t Evengelie volgens Lucas 04
01Jezus kwam vol van hillege Gaist van Jordaan weerom en wer deur de Gaist in woestijn rondlaaid.
02Doar wer e vatteg doagen oetdoagd deur duvel. Aal dij tied at e niks, en dou dij vatteg doagen om wazzen, haar e honger.
03Dou zee duvel tegen hom: "As ie Zeun van God binnen, zeg den tegen dij stain doarzo dat e brood worden mout."
04Mor Jezus zee: "Der staait schreven: 'n Mensk zel nait enkeld van brood leven.'"
05Dou laaidde hai hom omhoog en luit hom in ain tel ale keunenkrieken van wereld zain.
06Duvel zee tegen hom: "Ik zel joe aal heur macht en heerlekhaid geven. t Is mie ja in handen legd en ik geef t aan dij ik wil.
07As ie mie aanbeden is t aalmoal joenent."
08Mor Jezus zee: "Goa vot! Der staait schreven: 'Ie zellen de Heer, joen God, aanbeden en hom allain dainen.'"
09Hai laaidde hom noar Jeruzalem tou, zette hom op raand van tempeldak en zee tegen hom:
10 "As ie God zien Zeun binnen, spring hier den es òf. Staait ja schreven: 'Hai zel zien engels veur joe bestellen om joe te bewoaren'
11 en 'Op heur handen zellen ze joe droagen, dat ie joen vout nait aan n vlint steuten zellen.'"
12 Mor Jezus zee: "Der is zegd: 'Ie zellen de Heer, joen God, nait oetdoagen.'"
13 Dou duvel mit aal zien oetdoagerij kloar was, luit e hom mit vree en wachtte zien tied òf.
14 Jezus trok in kracht van hillege Gaist weer noar Galilea tou. Doar ging roup van hom oet in haile omgeven.
15 Hai gaf onderricht in heur sinagoges en elkenain prees hom.
16 Dou kwam e in Nazaret doar e grootbrocht was. En hai ging, zo as e wènd was, op sabbat noar sinagoge tou.
17 Dou ging e stoan om veur te lezen. En ze langden hom t bouk van profeet Jesaja tou. Hai dee t bouk open en von t stee doar schreven staait:
18 "De Heer zien Gaist rust op mie.
Hai het mie ja zaalfd,
om aarme stumpers bliede bosschop te brengen.
Hai het mie stuurd,
om dij vastzitten aan te zeggen dat ze lös kommen
en blinden dat ze weer zain kinnen,
om heur dij in boeien zitten in vrijhaid goan te loaten,
19 om aan te zeggen t joar van de Heer zien genoade."
20 Dou dee e t bouk dicht, langde hom weer tou aan dij dainst dee en ging zitten.
21 Hai begunde heur te zeggen: "Op t heden is dit schriftwoord dat ie net heurd hebben, woarhaid worden."
22 Ze luiten aalmoal blieken dat ze t mit hom ains wazzen en verwonderden zok over woorden van genoade dij hom over lippen kwammen en zeden: "Is dat nait ain van Jozef?"
23 Hai zee tegen heur: "Ie zellen vanzulm wel aanzetten kommen mit t taimke: Dokter, moak joe zulm beter! Dou aal dij dingen dij der noar t zeggen in Kafarnaüm gebeurd binnen nou ook es hier in joen voaderstad.
24 Mor," zee e, "eerlieks woar, dit zeg ik joe, der is gainain profeet dij in zien aigen stad in reken is.
25 t Is woar wat of ik joe zeg: der wazzen n bult wedevraauwen in Israël in Elia zien tied dou hemel drij joar en zès moand laank dicht bleef en der grode hongersnood kwam in t haile laand. Toch wer Elia noar gainain van heur toustuurd,
26 mor aal noar n wedevraauw in Sarepta bie Sidon.
27 In Elisa zien tied wazzen der n bult meloatsen in Israël en gainain wer genezen. Mor Naäman, de Syriër, aal."
28 In sinagoge werden ze aalmoal vergrèld dou ze dat heurden.
29 Ze sprongen in t èn, juigen hom tou stad oet en dreven hom noar raand van baarg tou doar heur stad op baauwd was, om hom der òf te steuten.
30 Mor hai laip midden tussen heur deur en ging vot.
31 Dou ging e noar Kafarnaüm, n stad in Galilea, en gaf heur aalgedureg onderricht op sabbatdoagen.
32 Ze stonden verboasd over zien leer. Zien woord haar gezag.
33 In sinagoge was ter ain mit n duvelse gaist. Dij begunde haard te roupen:
34 "Wat heb ie mit ons in t zin, Jezus oet Nazaret? Bin ie kommen om ons te verdaarven? Ik wait best wèl of ie binnen: God zien haailege!"
35 Mor Jezus gaf hom n goie inzeggen: "Hol die stil en goa oet hom vandoan!" En duvel smeet hom middenmaank mensken en ging oet hom vot zunder hom n spier kwoad te doun.
36 Ze werden aalmoal verbalderd en zeden tegen nkander: "Wat binnen dat toch veur woorden, dat e mit gezag en macht duvelse gaisten bestelt en ze goan vot!"
37 Zo ging der n grode roup van hom oet in t haile kontraain.
38 Dou kwam e in t èn en ging tou sinagoge oet noar Simon zien hoes tou. Simon zien schoonmoeke haar hoge koors. Ze raipen hom bie heur.
39 Hai boog zok over heur hèn en gaf koors n inzeggen. Dij ging vot en op slag ston ze op en bedainde heur.
40 Dou zun onderging, brochten ale lu dij zaiken haren mit wat veur kwoal ook, dij noar hom tou. Hai legde elkenain van heur handen op en muik heur weer beter.
41 Bie n haile bult gingen der duvels vot, dij oetraipen: "Ie binnen God zien Zeun!" Hai woarschaauwde heur, hai wol nait lieden dat ze dat zeden. Ze wozzen ja dat hai de Christus was.
42 Aanderdoagsmörgensvroug ging e vot noar n ainzoam stee tou. Mor t volk zöchte hom en kwam bie hom. Ze perbaaierden hom tegen te holden dat e nait weer bie heur votgoan zol.
43 Mor hai zee tegen heur: "Ook aan aander steden mout ik t evengelie verkundegen van God zien riek. Doar bin ik ja veur stuurd."
44 Hai preekte aaldeur in sinagoges van Judea.
|
